Jul 18
2010
સચ કા સામના – રિષભ મહેતા
પ્રકાર: ગઝલ 
સાહિત્યકાર : રિષભ મહેતા 
7 પ્રતિભાવો
[‘નવનીત સમર્પણ’ મે-2010માંથી સાભાર.]
ઊભા છો આપ કે અટકી ગયા છો ? લો, જવાબ આપો.
હજી નીકળ્યા જ કે પહોંચી ગયા છો ? લો, જવાબ આપો.
નથી સમજી શકાતું ખુશનુમા ચહેરો નિહાળીને
હસ્યા કે આપ આંસુ પી ગયા છો ? લો, જવાબ આપો.
હજી ગઈ કાલ સુધી ફૂલને ઓળખતા પણ નો’તા
અચાનક આજ કાં મહેકી ગયા છો ? લો, જવાબ આપો.
તમે ખીલી શક્યા છો, માત્ર એક શરૂઆત છે આ તો,
કઈ વાતે તમે બહેકી ગયા છો ? લો, જવાબ આપો.
જુએ છે બાગ તમને આજ પણ શંકાભરી નજરે,
હતા નિર્દોષ કે છટકી ગયા છો ? લો, જવાબ આપો.
તમે માણસ બન્યા એવી અહીં ઊડતી ખબર આવી
તમે કોનાથી આખર બી ગયા છો ? લો, જવાબ આપો.
યહાં હર રોજ કરતા હૈ સૂરજ ભી સામના સચ કા-
થતાં સંધ્યા જ ક્યાં ડૂબી ગયા છો ? લો, જવાબ આપો.
« Previous બા – દિલીપ જોશી
સૉરી ! – હરિશ્ચંદ્ર Next »
આપના પ્રતિભાવો
“તમે માણસ બન્યા એવી અહીં ઊડતી ખબર આવી
તમે કોનાથી આખર બી ગયા છો ? લો, જવાબ આપો”
વાહ…..વાહ…!!!!
ખુબજ સરસ કાવ્ય….
તમે ખીલી શક્યા છો, માત્ર એક શરૂઆત છે આ તો,
કઈ વાતે તમે બહેકી ગયા છો ? લો, જવાબ આપો.
તમે માણસ બન્યા એવી અહીં ઊડતી ખબર આવી
તમે કોનાથી આખર બી ગયા છો ? લો, જવાબ આપો.
હર કોઈને ઢંઢોળી મૂકે તેવી શાનદાર ગઝલ.
કેવી રીતે રચો છો તમે આટલી સુંદર ગઝલ? લો, જવાબ આપો.
નયન
“યહાં હર રોજ કરતા હૈ સૂરજ ભી સામના સચ કા-
થતાં સંધ્યા જ ક્યાં ડૂબી ગયા છો ? લો, જવાબ આપો”
પહેલી પંક્તિ હિન્દી અને પછી ની ગુજરાતી .. લો, જવાબ આપો
ઝૂમી રહ્યાં છે સૌ આપના શબ્દ તરંગોથી.
કોણ છે પ્રેરણા આપની? લો, જવાબ આપો.
ખુબ જ સરસ કાવ્ય છે