મારા વ્હાલુડા રાજાને – મેહુલ મકવાણા
[‘નિરીક્ષક’ સામાયિકમાંથી સાભાર.]
ઓ મારા વ્હાલુડા રાજા,
તારી જાહેરાત મેં વાંચી છે
ને મોટાં પાટિયાં પણ જોયાં છે
– પણ માફ કરજે મને
તારા ઉપવાસમાં ભાગીદાર નહીં થઈ શકું !
અગાઉ ઘણા દી’ મેં ભૂખ્યા કાઢ્યા છે
ને જાણું છું કે એવા બીજાય ઘણા કાઢવાના છે
ને તારી સાથે ઉપવાસ એ તો પુન સાથે
ભવિષ માટે ધાન બચાવવાનો લ્હાવો પણ છે
પણ માફ કરજે વ્હાલુડા રાજા
મારી બાર કલાકની પાળી છે,
મશીન સાથે બાથા ભરવાના છે,
ખેતરાવ ચોખ્ખાં કરવાના છે,
જંગલનાં ઝાડવાં ખોતરવાનાં છે,
નવમે માળે રોડા પાથરવાના છે,
જે મલે એ ખાવું પડશે
ભૂખ્યું નઈ રેવાય ભૈશાબ !
દહાડો નઈ પડાય ભૈશાબ !
આ સદભાવ તો ઠીક મારા ભૈ,
હશે તો વર્તાશે
ને આવશે તો પરખાશે,
પણ તું ભૂખ્યો રે’વાનો છે
એમાં જે બે ચાર રોટલા બચે તે મોકલજે !
ના ના… મારે હાટું નહીં !
હું તો હજુ કડે ઘડે છું.
લાત મારીને ય લણી લઉં છું.
પણ બીજાં ઘણાંય ઘરમાં ચૂલો નથી એમને માટે !
બાજુવાળાં નાથી ડોશીથી હવે ચલાતું નથી એને માટે,
ગયા વરહે લઠ્ઠામાં જે લટકી ગયો એ ભીખલાના છોકરાવ માટે,
ડેમમાં ચણાઈ ગયી’તી એ રમલીના ગાંડા બાપા માટે,
ગામ બાર મેલાયેલા સવશી ડુંગરના કુટુંબ માટે……
ઝાઝી તકલીફ ના લેતો વ્હાલુડા રાજા,
કટકો-બટકો જે બચે એ મોકલજે,
પાકું સરનામું તો નથી કોઈનું
પણ કહટી વેઠીને શોધી લેજે જરાક…
બીજું કંઈ ખાસ નઈ આટલું જ કારણ છે
બાકી તારી જાહેરાત મેં વાંચી છે
ને મોટાં પાટિયાં પણ જોયાં છે
પણ માફ કરજે મને.
તારા ઉપવાસમાં ભાગીદાર નહીં થઈ શકું !
Save article As PDF · 
Subscribe ReadGujarati
અતિ સુંદર…… ઉપવાસના નામે આખુ ગામ ગાંડા કરતા સૌ ને માટે
ઓહ્! સુન્દર્…સમજણ્ ના સથવરે….કઈક સમજિએ….
વાહ્.. વાહ !! શુ સુન્દર રચના, કેટલી સુન્દર ભાવના!!!!!!!
જાતની ફિકર-ચિતા કોરે મુકી, નીસહાય નિરાધાર લોકો માટે ચીન્તીત નીસ્વાર્થ, ઉદાર, ભદ્ર ભાવનાસભર હઇયુ.
આજના રાજાઓ અને બીજા ઉપવાસીઓ આવુ સમજતા હોય તો ઘણુ સારુ. પ્રજાએ પણ જાગ્રત થવાની જરુર છે.
Simply superb…
ખુબ સરસ કવિતા, સ્પર્શી જાય તેવી. અભિનન્દન.
ગજ્જ્બ સરસ… અભિનન્દન
મેહુલભાઈ,
આપની આ સંવેદના ઉપવાસનો ઉપહાસ કરતા માટીપગા નેતાઓ સુધી પહોંચે …
એ જ અભ્યર્થના. – કાલિદાસ વ. પટેલ { વાગોસણા }