- ReadGujarati.com - http://www.readgujarati.com -

પતંગ – રામુ ડરણકર

[ સૌ વાચકમિત્રોને આજના પતંગપર્વ એટલે કે મકરસંક્રાંતિની શુભકામનાઓ. પ્રસ્તુત બાળગીત ‘બાલમૂર્તિ’ સામાયિક જાન્યુઆરી-2012માંથી સાભાર લેવામાં આવ્યું છે.]

ઊંચે ઊંચે જાય મારો કેવો રે પતંગ !
આખાયે આકાશનો એ બદલે જાણે રંગ.

ઘડી ગોથ ખાય ને એ તો ઘડી દૂર જાય,
પવન આવે ત્યારે એ તો માથે સ્થિર થાય.

લાલ પીળો વાદળી અને વળી પટ્ટેદાર;
કેવી સુંદર સુંદર નભમાં બનતી હાર !

પૂંછડી બાંધી ચગાવું તો થાતો પૂછડીવાળો;
ખેંચમ ખેંચી કરતા મિત્રો થઈ જાતો ગોટાળો.

કદી ખેંચથી કાપું કદી મૂકી દઉં હું ઢીલ;
નાની મુન્ની હસી પડતી કેવું ખિલ….ખિલ !

દોરી મૂકું છુટ્ટી તો જાતો એ આકાશ;
એના મનમાં જાણે પહોંચું પ્રભુજીની પાસ.