- ReadGujarati.com - http://www.readgujarati.com -

ગઝલ – અંકિત ત્રિવેદી

ન દર્શન થાય કે સાચી દુઆ પણ નહીં મળે ત્યાંથી…
જવા દે તું, તને ગમતી હવા પણ નહીં મળે ત્યાંથી…

ચલો દુનિયાના રસ્તે આપણી બાજુ વળી જઈએ,
નથી દુર્જન મળે એવા, ભલા પણ નહીં મળે ત્યાંથી…

સમજથી પર થઈ અપનાવ નહીંતર તો કશા-માંથી,
બધું કરવા છતાં જોજે, મઝા પણ નહીં મળે ત્યાંથી…

ન નકશા છે, ન રસ્તા છે, નથી પગલી, નથી કંઈ પણ,
રખડવાથી વધારે આવ-જા પણ નહીં મળે ત્યાંથી…

લખેલું ભૂંસી પાછો સાવ કોરી સ્લેટ જેવો થા,
વધારે આથી સારી નામના પણ નહીં મળે ત્યાંથી…