- ReadGujarati.com - http://www.readgujarati.com -

પ્રિસ્ક્રિપ્શન – હેમેન શાહ

[1] લોહીની તપાસ કરી મૌલિક વિચારોનું પ્રમાણ કેટલું છે એ જાણી લેવું.

[2] નિરાશાની એક કૅપ્સ્યૂલ દિવસમાં ચાર વાર લેવી. (નિરાશા ન મળે તો ઉદાસી ચાલશે. દવા એ જ છે, ફક્ત કંપની જુદી છે.)

[3] સપનાંની બે ગોળી સૂતાં પહેલાં લેવી.

[4] આંખમાં રોજ સવારે ઝાકળનાં ટીપાં નાખવાં.

[5] દીવાનગીનાં ચશ્માં પહેરી કામે જવું. (એ મૅસર્સ મજનૂ ઍન્ડ રાંઝાને ત્યાં મળે છે.)

[6] પેટમાં બળતરા થતી હોય તો એક પ્યાલો ઠંડું મૃગજળ ધીરે ધીરે પીવું.

[7] યાદ બહુ જલદ દવા છે, પરંતુ ઓછી માત્રામાં અણધારી અસર બતાવી શકે. માટે ચાલુ કામકાજમાં ભેળવીને લેવી.

[8] અઠવાડિયે એક વાર એક્સપાયરી ડેટ પછીનું ઈશ્કનું ઈંજેકશન લેવું.

[9] શબ્દોની પરેજી રાખવી. શબ્દો વધુ પડતા ફાકવાથી કવિતાનું મૃત્યુ પણ થઈ શકે.

[10] આટઆટલી દવા કર્યા પછી, પ્રતીક્ષાની એક ટીકડી આયુષ્યભર ચાલુ રાખવી.

સહી
અનરજિસ્ટર્ડ પોએટ્રી પ્રેક્ટિશનર