- ReadGujarati.com - http://www.readgujarati.com -

પાછું – હર્ષ બ્રહ્મભટ્ટ

કયા જનમનું અચાનક થયું સ્મરણ પાછું ?
નજરની સામે એ જ વન અને હરણ પાછું.

બધું જ યાદ રજેરજ ને ભુલકણો પણ છું,
બધે જ શોધતો ફરું છું બાળપણ પાછું

બધી જ છીનવી લેશે શિશુની મૌલિકતા,
શીખવશે સર્વ વડીલો અનુકરણ પાછું.

બધું જ માંડ ગોઠવાય અહીં જીવનમાં,
બધું જ ક્ષણમાં વિખેરી જાતું મરણ પાછું.

પહાડનું એ પીગળેલું હર્ષ હૈયું છે,
નહીં ધકેલી શકો પ્હાડમાં ઝરણ પાછું.