- ReadGujarati.com - http://www.readgujarati.com -

આવે છે – નીલેશ પટેલ

[‘અખંડ આનંદ’ માંથી સાભાર.]

દોસ્ત નિષ્ફળતા લાખ આવે છે,
દિલને મજબૂત તો બનાવે છે.

રોટલો તો મળ્યો ભિખારીને,
રાતને ઓટલો વિતાવે છે.

મૂળથી આ શિખર સુધીનું દુઃખ,
જો, અધૂરું ફરી લખાવે છે.

આંગણું જે ગરીબ ઘરનું છે,
ત્યાં જ પંખીનું ટોળું આવે છે.

હું ય ભાંગીને ભુક્કો થઈ જઉં,
એક તારું સ્મરણ બચાવે છે.

એ હજી પણ નથી થયો પગભર,
એક પરપોટો ઘર બનાવે છે.

છાંયડને જરાય ચેન નથી
તડકો આખો દિવસ ભગાવે છે.