[1] વાર્તા મૌલિક અને અપ્રગટ હોવી જોઈએ. વાર્તા મૌલિક છે કે નહિં તેની તમામ જવાબદારી મોકલનાર લેખકની રહેશે, આ સંબંધી જવાબદારી રીડગુજરાતી, સ્પર્ધાના નિર્ણાયકો કે તેના તંત્રીની રહેશે નહીં. પ્રાપ્ત થયેલી વાર્તાઓને ઓનલાઈન પ્રકાશિત કરવાનો સર્વ પ્રથમ હક્ક રીડગુજરાતીનો રહેશે.

[2] વાર્તા 1800 થી 3000 શબ્દો વચ્ચેની હોવી જોઈએ. વાર્તા સ્વીકારવાની છેલ્લી તારીખ 30-જૂન-2008 છે. આ પછી પ્રાપ્ત થયેલી વાર્તાઓનો સ્પર્ધામાં સમાવેશ કરવામાં આવશે નહિ. આ સ્પર્ધા માટે સામાજીક, લગ્નજીવન, કૌટુંમ્બિક, પ્રેમકથાઓ કે સાહિત્યના કોઈ અન્ય ભાવને રજૂ કરતી વાર્તા મોકલી શકાય છે. સ્પર્ધામાં બાળવાર્તાઓ, પ્રવાસવર્ણનો, ઈતિહાસકથાઓ લઈ શકાશે નહિ. તેમજ કોઈ પ્રકારના અશિષ્ટ લેખનને સ્વીકારી શકાશે નહિ.

[3] વાર્તા હસ્તલિખિત કે કૉમ્પ્યુટર પ્રિન્ટ કરેલ - એમ બંને માંથી કોઈ પણ ચાલી શકે છે. હસ્તલિખિત મોકલનારે,વાર્તા સ્વચ્છ અને સુવાચ્ય અક્ષરોએ કાગળની એક બાજુ લખવાની રહેશે. બંને માંથી કોઈ પણ પ્રકારે વાર્તા મોકલનારે પોતાનું નામ, સરનામું, ઉંમર તેમજ સંપર્ક માટે ટેલીફોન નંબર/મોબાઈલ (જો હોય તો) અને ઈ-મેઈલ એડ્રેસ (જો હોય તો) વાર્તા ની સાથે મોકલવાના રહેશે. આ માહિતિના અભાવમાં વાર્તા સ્વીકાર્ય ગણાશે નહિ. (ટેલીફોન નંબર અને ઈ-મેઈલ એડ્રેસ મરજીયાત છે.)

[4] વાર્તા જો કૉમ્પ્યુટરમાં ટાઈપ કરેલ હોય તો તેને ઈ-મેઈલથી પણ મોકલી શકાય છે. આ માટે માઈક્રોસોફટ વર્ડ (DOC) કે પી.ડી.એફ (PDF) ફોરમેટ ચાલી શકે છે. અત્રે ખાસ યાદ રહે કે આ રીતે વાર્તા મોકલનાર સ્પર્ધકે ટાઈપ કરવા માટે જે ફૉન્ટ વાપર્યા હોય તે પણ સાથે મોકલવા જરૂરી છે. આ રીતે વાર્તા મોકલાનારે પણ મુદ્દા નંબર (3)માં આપેલ વિગતો જેવીકે નામ, સરનામું વગેરે જણાવવાના રહેશે. ઈ-મેઈલથી વાર્તા મોકલનારે ઈ-મેઈલમાં Subject ના ખાનામાં "Varta-Spardha-2008" એમ લખવું. વાર્તાની ફાઈલ એટેચમેન્ટ તરીકે મોકલવી.

[5] આ સ્પર્ધામાં વિજેતા બનેલ પ્રથમ ત્રણ વાર્તા ને પુરસ્કાર આપવામાં આવશે. એ સિવાયની બીજી ત્રણ આશ્વાસન વાર્તાઓ પણ પસંદ કરવામાં આવશે. આમ કુલ છ વાર્તાઓ સાઈટ પર યોગ્ય સમયે પ્રકાશિત કરવામાં આવશે. વાર્તા-સ્પર્ધાના પરિણામોની તારીખ નીચેના કોષ્ટકમાં આપેલી છે. પુરસ્કાર માત્ર ભારતીય ચલણમાં જ આપવામાં આવશે.

[6] વાર્તાની પસંદગી તેમજ નાપસંદગીનો હક નિર્ણાયકોનો રહેશે જે તમામ સ્પર્ધકોને બંધન કર્તા રહેશે. સ્પર્ધા માટે મોકલાયેલ વાર્તાઓ પરત કરવાની પ્રથા નથી. તેથી દરેક સ્પર્ધકે વાર્તા મોકલતા પહેલાં પોતાની પાસે તેની એક કોપી જરૂરથી રાખવી.

સ્પર્ધાની શરૂઆત : 5-મે-2008

વાર્તાઓ સ્વીકારવાની છેલ્લી તારીખ : 30-જૂન-2008

વાર્તા સ્પર્ધાના પરિણામની તારીખ : 5-ઑગસ્ટ-2008

પુરસ્કાર વિતરણની તારીખ : 10-ઑગસ્ટ-2008

ઈ-મેઈલથી મોકલવા માટે :

E-mail Address : shah_mrugesh@yahoo.com
Subject : Varta-Spardha-2008
Attachment : Microsoft Word File / PDF File.

પોસ્ટ / કુરિયરથી મોકલવા માટે :

મૃગેશ શાહ
7, ગીતાપાર્ક સોસાયટી,
બ્રાઈટ સ્કુલની પાછળ,
વી. આઈ. પી. રોડ.
કારેલીબાગ. વડોદરા-390022
ગુજરાત (ભારત)

Mrugesh Shah
7, Geeta Park Society,
B/H Bright School,
V.I.P Road, Karelibaug
Vadodara (Baroda) - 390022
GUJARAT - INDIA.

પ્રથમ પુરસ્કાર : રૂ. 3001

દ્વિતિય પુરસ્કાર : રૂ. 2001

તૃતિય પુરસ્કાર : રૂ. 1001

[1] અવંતિકા ગુણવંત
શ્રીમતી ‘અવંતિકાબેન ગુણવંત’ના નામથી સૌ કોઈ પરિચિત હોય જ. તેમની કલમ વર્ષોથી સમાજની અનેક સમસ્યાઓના પ્રેમપૂર્ણ નિવારણ માટે સતત ચાલતી રહી છે. વર્તમાનયુગની વાસ્તવિક પરિસ્થિતિઓને આવરી લેતી માનવીય જીવનની જટિલ સમસ્યાઓનો તેમણે વાર્તાઓના માધ્યમથી સરળ શબ્દોમાં ઉકેલ આપ્યો છે. તેમની કૃતિઓએ અનેક પરિવારોને જોડ્યા છે, માનવીય હૈયામાં સંવેદના જગાવી છે, દુ:ખીને હૈયાધારણ આપી છે અને લગ્નજીવનના સાચા અર્થનો નવયુગલોને પરિચય કરાવ્યો છે. તેમના ‘માનવતાની મહેક’, ‘સહજીવનનું પ્રથમ પગથિયું’, ‘ગૃહગંગાને તીરે’, ‘આપણી પ્રસન્નતા આપણા હાથમાં’ જેવા 15થીયે વધુ વાર્તાના પુસ્તકો આજદિન સુધી પ્રકાશિત થયેલા છે. તેમની સાથેની મુલાકાત પણ રીડગુજરાતી પર પ્રકાશિત કરવામાં આવી છે.

[2] જૉસેફ મૅકવાન
સુપ્રસિદ્ધ વાર્તાકાર તથા નવલકથાકાર તરીકે ‘જૉસેફ મેકવાન’ એ ગુજરાતી સાહિત્યમાં ખૂબ જાણીતું નામ છે. ‘વ્યથાનાં વીતક’ (રેખાચિત્રો) થી શરૂ કરીને 2005માં પ્રકાશિત થયેલ ‘અપનો પારસ આપ’ સુધીની સાહિત્યયાત્રામાં તેમણે 13 જેટલી નવલકથાઓ ગુજરાતી સાહિત્યને આપી છે. ‘આંગળિયાત’ તેમની સૌથી પ્રસિદ્ધ અને પુરસ્કૃત નવલકથા છે. તેમની વાર્તાઓ સાહિત્યના ઉત્તમ સામાયિકો, જન્મભૂમિ પ્રવાસી જેવા અખબારોમાં પ્રકાશિત થતી રહી છે. માત્ર એટલું જ નહિ, તેમની કેટલીક કૃતિઓ ગુજરાતી પાઠ્યપુસ્તકમાં પણ સ્થાન પામી છે. તેમણે સર્જેલા પાત્રો આજે પણ લોકહૃદયમાં જીવંત રહી શક્યા છે. આજીવન શિક્ષક તરીકે કાર્ય કર્યા બાદ તે ‘ઘર’, ‘સમાજ’, ‘શાળા’, ‘સંસ્કૃતિ’ અને ‘પ્રકૃતિ’ ને કેળવણીના મુખ્ય પાંચ પરિબળો માને છે. ધર્મના સાચા મૂલ્યો સમાજ સામે મૂકવા માટે તેમજ અનેક સામાજિક દૂષણોને દૂર કરવા માટે તેમની કલમે નોંધપાત્ર પ્રદાન કર્યું છે. ‘મનખાની મિરાત’, ‘ભીની માટી કોરાં મન’, ‘લક્ષ્મણની અગ્નિપરીક્ષા’, ‘અમર ચાંદલો’ વગેરે તેમની મુખ્ય નવલકથાઓ છે.

[3] વંદના ભટ્ટ
વ્યવસાયે વકીલ એવા વંદનાબેન ભટ્ટનો ‘ઝંખના પરોઢની’ નામનો ટૂંકી વાર્તાસંગ્રહ પ્રકાશિત થયેલ છે. તેમના નામે તેઓ ‘કોલાજવર્ક’ નામનો હિન્દી કવિતાસંગ્રહ પણ ધરાવે છે. ‘અખંડ આનંદ’, ‘નવનીત સમર્પણ’ જેવા સાહિત્યિક સામાયિકોમાં તેમની વાર્તા, કવિતા, પ્રવાસવર્ણન અને ચરિત્રલેખ સમયાંતરે પ્રકાશિત થતા રહે છે. ‘દિવ્યભાસ્કર-કળશ’માં તેઓએ અનેક વ્યંગ લેખો લખ્યા છે. કેટલાક હિન્દી સામાયિકોમાં તેમણે અતિથિ સંપાદક તરીકેનું કાર્ય કરેલ છે. તેમના કાવ્યો ‘આંતરાષ્ટ્રીય કવિતા સંગ્રહ’ના સંપાદનમાં પસંદ થયેલ છે. વડોદરાની સાહિત્યિક સંસ્થાઓ જેવી કે ‘શબ્દસેતુ’, ‘બુધસભા’, ‘સંવેદના’, ‘અસ્મિતા’, ‘અક્ષરા’માં સક્રિય રીતે તેઓ ભાગ લઈ રહ્યા છે. તેમની ઘણી કૃતિઓ અગાઉ રીડગુજરાતી પર પણ પ્રકાશિત કરવામાં આવી છે, જેને સુંદર પ્રતિભાવ સાંપડ્યો છે.

[1] વાલાડોસાનું ફૂલેકું/ સંજય ગોટી : http://www.readgujarati.com/sahitya/?p=1305
[2] રાણકદેવીના ગાલપરનું લાખું / રાહુલ શુક્લ : અપ્રકાશિત.
[3] સનમની શોધમાં / સુચી વ્યાસ : http://www.readgujarati.com/sahitya/?p=1321