નથી હોતા…. – સાહિલ

ભરમ હોવા છતાં દ્રશ્યો બધાં ખોટા નથી હોતા.
અરીસાથી પ્રતિબિંબો ભલે મોટા નથી હોતા.

ગગનના વ્યાપના વિસ્તાર છે પર કલ્પનાથી પણ
નયનને આવરી લે એવાં મસમોટા નથી હોતા.

ગણતરીમાં તમે ખાઈ ગયાં છો થાપ કૈં ચોક્કસ,
જો સરવૈયા પ્રણયના હોય તો તોટા નથી હોતા.

નિરાંતે જ્યાંજરા લંબાવીને ભૂતકાળ વાગોળે,
બધાંની પાસે એવા યાદના ઓટા નથી હોતા.

ભલેને એકસરખા માણસો બે ના મળે જગમાં,
છતાં કોણે કહ્યું કે જીવના જોટા નથી હોતા.

નિયમ સાબિત કર્યો હર જન્મમાં અપવાદ થઈ ‘સાહિલ’
અમે ડૂબ્યાં છીએ જ્યાં ત્યાં જ પરપોટા નથી હોતા.